Bide Okerretik Zuzen

KEA, "copenhague"tik Txolarre irratira

2011-03-02T09:01:00.000-08:00

Kea taldea izango da gaur gauean Bide Okerrean. Bertan, argitaratu berri duten "copenhague" diskoa berria aurkeztuko dute. Beasaingo hiruko taldearen bigarren diskoa da honakoa, 2007an estreinuko lana kaleratu ondoren. Zortzi kantu berrietan zehar, giro intimoak, eta rock zertzelak bat egiten dute musika eremu ezberdinak sortuz.

Info zabalagoa:
http://www.myspace.com/keataldea

KORUMBA, infernutik Txolarre irratira

2011-02-16T08:50:00.000-08:00

Korumba taldeak disko berria kaleratu berri du "Gizateri" izenpean eta gaur gauen zuzen zuzeko elkarrizketan aurkeztuko dute Bide Okerrean. Taldearen hirugarren lana den honetan, Korumbak aurretik abiaturiko musika eran sakontzen du: Intentsitate handiko metal musika gogor eta indartsua. Taldearen jatorriak 2000 urte inguruan kokatzen dira, nahiz eta gaur egungo formazioarekin 2005 urte ingurutik martxan egon.

info zabalagoa:
http://www.myspace.com/korumba

Bueltan Gatoz!!!!!

2011-02-08T08:33:00.000-08:00

Bueltan Gatoz!

Kostata baino hemen gira!!!
Txolarre Irratiak izandako Antena arazoak konponduta, berriz ere prest gara Bide Okerretik Zuzen Irratsaioa martxan jartzeko. Asteazkenean, otsailaren 09an, emango diogu bide aurtengo lehen irratsaioari. Azken hilabeteetan argitaratu diren diskoak izango ditugu entzungai, bai eta azken aste honetako nobedadeak. Laster jarriko ditugu abian elkarrizketak, eta beste zenbait atal.

SURFIN KAOS, Goizaldeak eta gauak...

2010-06-10T16:48:00.000-07:00

Surfin Kaos taldea izan dugu berriz ere Bide Okerrean. Donostiako hirukoa albiste da egunotan “Goizalde Surrealistak” diskoa kaleratu berri duelako Brian´s Recods diskoetxearen babeseab. Aitzakia hori hartuta, Koldo Soret taldeko abeslari eta gitarra-jotzailea gonbidatu dugu gurera taldearen iraupen luzeko laugarren diskoaz hitz egiteko. Musikalki garapen etengabean, rock&rollaren eremu ezberdinak ukitu dituzte aniztasunez beterik dagoen disko bikainean: Hard-rocka, Psikodelia, Soula, edota Bluesa bezalako musika erak bat egiten dute betiko rock sutsu eta kantu anfetaminikoekin batera. Ordubeteko elkarrizketa mamitsuan disko berria eta taldearen ingurukoak izan ditugu nagusi.

http://www.myspace.com/surfinkaos

MANTISA, itsaso oldarkorraren indarraz

2010-06-02T03:20:00.000-07:00

Gaur gaueko irratsaioan, Mantisa taldea izango dugu Txolarre irratiko estudioetan taldearen lehen diskoa aurkezten. Bost urteko musika ibilbidea behar izan dute estreineko diskoa argitaratua ikusteko, baino merezi izan du denbora tarte hau itxarotea. Urte hauetan guztietan zuzeneko emanaldi piloa eta grabaketa txikiak burutu badituzte ere, Gor zigilu nafarrak eman die iraupen luzeko lehen lan hau kaleratzeko bultzada. Musikalki hardcore melodikoaren inguruan abiatu zuten musika bidaia, baina igarotako denboraren poderioz eta musika eragin berrien sartzearekin batera, zabaldu eta handitu egin da taldearen musika era, egun, etiketa bakar baten azpian kokatu ezin delarik Mantisaren proposamena.

More info:
http://www.myspace.com/mantisa

COHEN, egurra banatzen

2010-05-27T19:03:00.000-07:00

Cohen taldea izan dugu Txolarre irratiko estudioetan argitaratu berri duten “Subconscious Mind” (auto-ekoizpena) diskoa aurkezten. 2004ean Urnietan sorturiko laukoteak, post-hardcore giroetan kokatzen du bere musika jarduera, non erritmo biziak eta azkarrak giro lasaiago eta energikoekin nahasten diren ekaitza eta barealdiak irudikatuz. Urnieta eta Madrilen artean grabaturiko diskoa, Suedian nahastu eta masterizatu zen Tonteknik Studioetan, non besteak beste Refused edota Poison the Well bezalako taldeekin lan egin duten. Urte hauetan guztietan dozenaka kontzertu eskaini dituzte, tartean Madrilen Berri Txarrak taldearen aurrean jo zutenekoa ere. Gaztetasuna eta indarra bat egiten dute Cohen taldearen musikan, eta “Subconscious Mind” diskoa da aurkezpen txartelik hoberena.

INFO ZABALAGOA:
http://www.myspace.com/cohenmusika

BIDE OKERRETIK ZUZEN!!! LAUROBA

2010-05-19T09:21:00.000-07:00

Lauroba taldea izango da gaur gaueko protagonista Bide Okerretik Zuzen saioan. Berriki argitaratu dute “Egunarekin” (GOR zigilua) diskoa, taldearen iraupen luzeko bigarren lana, eta hori izango da gauean burutuko dugun elkarrizketaren ardatz nagusia. Utikan edota Hamaika Bide taldeetan jardun eta gero, Iker Lauroba (gitarra eta ahotsa nagusia) etxean kantuak sortzen hasten da, jolas baten modura, barneko musika arra asetzeko ideia bakarrarekin. Apurka, bakarka abiaturiko musika bidaia itxura hartzen joan zen, lauko taldea osatu, eta maketa bat kaleratu eta gero, lehen diskoa kaleratu zuten 2008an. Lan berri honek, “gauari gauarekin” diskoaren segida kontsideratu dezakegu. Ez bakarrik musikalki, (non eremu berriak ere sumatzen diren lan berrian), bai eta izenburuan ere, non “gauari gauarekin” eraso egin eta gero, “egunarekin” ere pop-rock musika gozo baino indartsuez astintzen duten.

More info:

http://www.myspace.com/lauroba

BIDE OKERRETIK ZUZEN!!! Bertsio Gaua III!

2010-05-12T10:31:00.000-07:00

Euskal musikagintzaren bidezidorretatik barna Bide Okerra aurrera darrai etengabean. Zuzeneko elkarrizketak alde batera utzi eta BERTSIO GAUAri ekingo diogu saio berri bat burutuz. Hirugarrengoz ospatuko dugu Bertsio gaua gurean, eta bigarrenez, Euskal Rock musika taldeak izango dira protagonista. 70 hamarkadako abeslari eta kantautoreekin abiatu genuen ziklo hau, eta Euskal Herriko Rock taldeak izan ziren bigarren saioan nagusi. Honakoan ere, ari horretatik egingo dugu tira, eta aurreko saioan kanpoan geratu ziren hainbat kantu jarriko ditugu gaurkoan eta besteak beste, M-ak, Itoiz, Su Ta Gar, Anestesia, Bap!!!, Danba edota Hemendik At taldeak pasako ditugu musika irabiagailutik.
Entzun eta gozatu!

NEVER SURRENDER, 11 istorio, bROnCKa ta gau ero!

2010-04-29T20:37:00.000-07:00

Never Surrender talde arrasatearra izan da gaur gaueko irratsaioaren zutabe nagusia. 2002. urtean punk-oi! giroetan sorturiko musika taldeak disko berria du kalean, “11 istorio, bROnCKa ta gau ero!” (108 Records), eta hori izanen da, hain xuxen ere, gaurko protagonista. Gaur entzungai izango den elkarrizketa Arrasateko Gaztetxean burutu genuen, eta galderei erantzuten Pottoko (ahotsa) eta Arri (gitarra) izan genituen. Never Surrender taldearen disko berriena ezagutzeaz gain, berriki argitaratu diren diskoei ere errepaso emango diogu saioaren bigarren zatian.

More info:
http://www.myspace.com/neverarrasate
http://www.gara.net/paperezkoa/20100430/196710/eu/Disko-honetan-nagusiki-ahotsari-eta-mezuari-eman-diogu-garrantzia

ENTZUN SAIOA HEMEN:

Ir a descargar

NATURAL PROJECT, ESKEMAK APURTUZ!

2010-04-22T02:57:00.000-07:00

Bart gaueko irratsaioan Natural Project taldea izan genuen Txolarre irratiko estudioetan “Discontinuidad” (Auto-ekoiztua, 2010) diskoa aurkezten. Estanis Elorza (Ahotsa eta gitarra) eta Aitor San Sebastian (Bateria) taldekideek laukote andoaindarraren iragana eta oraina azaldu ziguten ordubete iraun zuen elkarrizketa mamitsuan. 1995. urtean sortu zen talde Natural Project, eta musikari aldaketa dezente izan ditu urte hauetan guztietan, musika norabidea ere garatu duelarik azken hamarkada honetan. Pop-rock doinuak, elektronika ukituak, eta batez ere dantza egiteko gonbita egiten duten kantuak bat egiten dute musikan ere ezarritako arauak apurtu nahi dituen talde honetan. Irratsaioaren bigarren zatian berriz, musika albisteak eta disko berriak izan ziren protagonistak.

MORE INFO:
http://www.myspace.com/naturalprojectmusic
http://www.naturalproject.com/

Disko berriak protagonista!

2010-04-18T16:45:00.000-07:00

Azken hilabeteetan jaso ditugun hainbat disko eta maketa izango dira gaur gaueko saioaren ardatz nagusia. Udara begibistan den honetan, diskoen argitaratzea gora egin du gurean, eta labetik atera berri diren lanak ziztatuko ditugu. Era berean, pasaden urtekoDurangoko Azokak utzitako uzta oparo horretatik ere diskoak berreskuratuko ditugu. Zentzu horretan, bi ordutako saio monografiko honetan Doctor Deseo, Piztiak, Desordutan, Lauroba, Memo, Elkano Browning Cream, Natural Poject, The Uski`s, Sagarroi, Joseba Irazoki, On Benito, Gora Gora Kids, Kean, Potemkin, Sorotan Babies, Norman, Siroka, Bide Ertzean, edota Malenkonia izango dira gurekin.

Ze Esatek!!!!! Musika eta Festa!

2010-03-24T05:10:00.000-07:00

Azken bolada honetan zer esan ugari ematen ari den taldea izango dugu gaurkoan Txolarre irratiko estudioetan: Ze Esatek! Izen xelebre horren atzean, taula gainean hamar laguneko banda biltzen duen taldea topatuko dugu, non musika mestizaia, patxanga, eta musikaz ongi pasa eta aldarrikatzeko gonbitea egiten duten eszenatoki eta oholtza bakoitzean. Berriki, Baga-Biga Musika Ideiak diskoetxeak argitara eman duen iraupen luzeko lehen diskoa izango dugu protagonista, taldeko zenbait kide gure estudioetan izango direlarik, taldearen oraina eta geroaz mintza egiteko.

More info:
http://www.myspace.com/zeesatektaldea
http://www.baga-biga.com/denda/portada.php?det=3∏=105#grupo_105

ENTZUN HEMEN

Ir a descargar

JOSEBA IRAZOKI, bustitzeari beldurrik ez!

2010-03-16T22:51:00.001-07:00

Gutxi izango dira Joseba Irazokik adinako sortze gaitasuna izan duten euskal musikariak azken urte hauetan guztietan. Gitarrista aparta, asko izan dira lagundu dituen bandak eta bidean grabaturiko diskoak. Bera-ko (Nafarroa) Aduanako entsegu lokaletan sortu eta hazia, bere musika Euskal Herriko zazpi lurraldeetara zabaldu du, parte hartu duen hamaika proposamen eta musika abenturetan: Zup, Maixa eta Ixiar, Petti, Rafa Rueda, Do, On Benito, Atom Rhumba… edota bere izen propioan. Aurrez grabaturiko elkarrizketa izanen da gaurkoa. Pasaden Urtarrilean Donostiako DOKA aretoko kamerinoetan grabatu genuen honako audioa, eta gaur gurera ekarri nahi izan dugu. “Euria ari du” (Moonpalace Records 09) diskoa ezagutuko dugu gaurkoan, diseinu lan eder eta zoragarri horretako zenbait kantu entzuteko aukera ere izanen dugularik.

More info:
http://www.myspace.com/josebairazoki
http://www.myspace.com/moonpalacelovesyou

Entzun hemen:
Ir a descargar

ESNE ZOPAK... Esnea eta ogia!

2010-03-09T17:25:00.000-08:00

Esne Zopak egiteko, bi osagai soilik behar dira: Esnea eta ogia. Eta kantu on bat egiteko berriz, beste bi: Trikia eta panderoa. Zergatik ez? Zertarako gehiago?. Askotan, bizi garen garai teknologiko hauetan, aurrerapenak, aro digitalak, post-produkzioak, ordenagailuak, Control C + Control V, edo makina eta tresna ezberdinek gainditu egiten gaituzte, gure benetako arima, soula, bidean salduz, galduz. Zuri beltzeko argazki zahar batek irudikatzen du Esne Zopak diskoaren azala. Horrelakoa du zaporea. Zaharra eta zuri beltzekoa. Lehen begi kolpearen atzean alta, giro tradizionalak aberastu daitezkeela erakusteko gai dira, DJ baten zertzelada eta marrazketa ederrekin tradizionala modernoa bilakatuz: Tradi-Modern.

Distortsioa, gitarra zorrotzak, bonbo bikoitzak, eta metal zoom pedalerak alde batera utzi eta trikia eta panderoa astinduko dute gaurko irratsaioa. Zentzu horretan, trikitilari zaharren mundua ezagutzeko parada ere izango dugu, hamaika istorio eta abentura gordetzen baitituzte “esnesaltzailearena” izeneko Disko-DVDko kantuak. Soinu txikia lagun, infernura eginen dugu bidai Bide Okerrean, kuatrolatas baten gainean.

More Info:

http://www.hotsak.com/denda/esne-zopak-esnesaltzailearena

JOK, kaxoian gordetako kantak.

2010-03-02T18:56:00.000-08:00

JOK izenaren azpian, Jokin Larraza musikari Tolosarra ezkutatzen da. Azken urte hauetan ugaritu egin dira proposamen pertsonalak aurkezten dituzten musika sortzaileak. Musika grabatzeko erraztasunak, eta musika zabaltzeko bideen ugaltzeak (Interneta, CD-a, mp3a…) ohiko zirkuitu komertzialetik at, bide berriak zabaldu ditu, ate berriak irekiz. Kaxoian gordetako kantuak berreskuratu, jantzi berria ezarri, eta “inoiz baino” izenpean kaleratu ditu Jokinek azken urte hauetan egindako abestiak. Kantu horiek izango dira protagonista gaurko irratsaioan.

More info:

http://www.myspace.com/jokinlarraza

ANGER… ARROSA OLDARKORRA

2010-02-24T00:33:00.001-08:00

Asteazken gaueko saioan, ANGER taldea izango dugu estudioan “Sedukzioaz” diskoa aurkezteko. Arrasateko laukoa iraupen luzeko bigarren diskoa kaleratu zuen 2009 azaroan Musikherria herri diskoetxearen zigilupean, eta horixe izango da irratsaioaren zutabe nagusia.

Arrosa koloreko digi-pack formatuko lan erakargarri baten atzean, musika eztanda oldarkorra eta kritika soziala biltzen da, diskoak barneratzen dituen hamar kantuetan zehar. “Sedukzioaz” laneko zenbait kantu ere entzun ahal izango dira gaurko saioan gaueko bederatzietatik aurrera.

More Info:
http://www.myspace.com/angersarean

http://angerweb.net/

BERRITXARRAK...Payola, payolaren kontra!

2010-02-16T18:08:00.000-08:00

Gaur gaueko irratsaioan, Berri Txarrak taldeko Gorka izango dugu Txolarre irratiko estudioan “Payola” diskoa zuzeneko elkarrizketan aurkezten. Ohikoan, berriki argitara eman diren diskoak izan ohi dira gurean protagonista, labetik atera eta gutxira ezagutara ematen ditugularik Bide Okerrean. Hilabete batzuk igaro dira “Payola” diskoa argitaratu zenetik eta hortaz diskoa soseguz entzuteko aukera izan dugu. “Payola”ren zirrikitu guztietan murgilduko gara, biniloaren ildo bakoitzean sakonduz. Horixe izango da elkarrizketaren mamia, taldearen zuzeneko emanaldi eta egungo egoerarekin batera.

More Info:

http://www.berritxarrak.net/

Disko berriak protagonista!

2010-02-10T10:10:00.000-08:00

Aste honetako irratsaioan, azken hilabetetan argitaratu diren diskoak izango dira protagonista nagusiak, bi ordu iraungo duen saio monografikoan. Horrela bada, Norman, Jok, Argazki bat behelainoan, On Benito, The Riff Truckers, Kaleginez, Desordutan, Esne Zopak… entzungo dira gure uhin libreetatik. Tartean, bidean geratu zaizkigun zenbait disko entzuteko aukera ere izango dugu. Beti ere, Euskal Herriko musikaren bidezidorretan barna.

LOAN... Kobazuloetako uluak!

2010-02-03T05:36:00.001-08:00

Aste honetako irratsaioan Bilboko LOAN talde izango dugu protagonista nagusia. Erritmo ilunak, intentsitatez beteriko doinuak, zarata, ekaitz eta barealdi, Stonerra, Sludge Rocka, Doom Metala, Psykodelia …Kobazuloetan eginiko saiakerak izango dira gaurkoak “Hontziria” diskoa aurkeztearekin batera. Diskoa, 2009ko maiatzean argia ikusi bazuen ere, askotan egunerokotasunak irentsi egiten gaituen musikaren errepide honetan. Alta, inoiz ez da berandu pasaden urteak eman duen disko interesgarrienetariko bat ezagutzeko.

MORE INFO:

http://www.myspace.com/loantaldea

http://www.musikaze.com/eu/musika/seiluak/seilua.php?site=ODIOSONORO

http://www.youtube.com/watch?v=J_FEePOwXC8&feature=related

SEXTYSEXERS.... Ziklon Birika puzten!

2010-01-26T20:33:00.000-08:00

Aste honetako zuzeneko elkarrizketan, SextySexers taldearen disko berria ezagutzeko aukera izanen dugu. Berako taldeak “Hero Mantra” izeneko diskoa ekarriko du besapean, mundu mailako Volcom Entertainment diskoetxean argitaratua. Rockanrrolaren Samuraiak bueltan dira Txolarre irratiko estudioetara: “Iluntze berri baten bila” diskoa aurkezten izan ziren duela zenbait urte, eta asteazken honetan berriz ere eginen digute bisita. Plazer bat. Elkarrizketa 9-etan abiatuko dugu, saioaren lehen ordua SextySexers taldeari eskainiko diogularik osoki. Irratsaioaren bigarren zatian berriz, azken asteetan kaleratu diren zenbait disko eta maketa entzuteko parada izango dugu, asteburuko agenda errepasatzearekin batera.

* Ezin amaitu iruzkin hau, DES-KONTROL taldeari gure atxikimendua, babesa eta sostengua adierazi gabe. Kolpe eta mehatxu guztien gainetik, aurrera begira!

MORE INFO:

http://sextysexers.blogspot.com/

http://www.myspace.com/sextysexers

http://www.promomusika.com/bereziak/SEXTYSEXERS/sextysexers2.html

GOSE...Dastatu eta gozatu!

2010-01-22T18:43:00.000-08:00

Bide Okerretik Zuzen! berriz ere uhinetan… 2010ari martxa hartzea kosta egin zaigu, eta pasaden asteazkenean burutu genuen urteko lehen saioa. GOSE taldea izan genuen gaueko protagonista, disko Gorria kaleratu dutela aitzakia hartuta. Elkarrizketa pasaden abenduan grabatua izan zen Arrasateko Shot! Estudioetan, eta bertan, taldeko hiru kideak batu ziren: Iñaki, Ines eta Osoron. Grabaketaren soinu kalitatea handia ez bada ere, elkarrizketak duen interesagatik erabiltzea deliberatu dugu. Musikaren GOSE bazarete….On egin!

Saioa zintzilikatu dugu dagoeneko, beraz sartu gure blogean http://www.bideokerretikzuzen.blogspot.com eta entzun!

* Urtarrilaren 27ko saioan SEXTYSEXER izanen ditugu estudioetan HERO MANTRA disko berria aurkezten. Are You Ready?

ENTZUN SAIOA

Ir a descargar

2009ko uzta

2010-01-06T18:46:00.000-08:00

EGIN KLIK IRUDIAK HANDIAN IKUSTEKO

Honatx 2009ak eman duena…
2010a abiatu berri den honetan, atzera begira egin eta 2009an zehar egin ditugun irratsaioen bilduma osatu dugu. Gure webgunean entzungai dituzue zenbait irratsaio, bai eta elkarrizketa zaharragoak ere. Urtarrilaren 13 asteazkenez ekingo diogu denboraldi berriari Euskal Herriko entsegu lokaletan egosten ari denaren bozgorailu izateko asmotan. Gogor sakatuko dugu azeleragailua lehen saio hauetan, eta bide horretan besteak beste, Loan, Berri Txarrak, SextySexer, Sermond´s edota Anger igaroko dira gure estudioetatik.

http://www.bideokerretikzuzen.blogspot.com

DES-KONTROL... "Aurrera begira"

2009-12-09T08:21:00.000-08:00

Durangoko liburu eta disko azokatik bueltan, DES-KONTROL taldearen disko berria ezagutzeko aukera izango dugu gaur gatean. Aurrez grabaturiko elkarrizketa bat profitatuz, “Aurrera begira” diskoa aurkeztuko dugu, eta bide batez, Arrasateko taldearen inguruko albiste eta berriak ere aipatuko ditugularik. Gainera, Azokan eskuratu ditugun diskoak entzuteko aukera izanen dugu ere. Euskal Herriko musikaren errepidetik… Fite, abiadura bizian!!!

More Info:

http//:www.myspace.com/des-kontrol

http//:www.bideokerretikzuzen.blogspot.com

DURANGOKO LIBURU ETA DISKO AZOKARI BURUZ...

2009-12-02T04:49:00.000-08:00

Gaur gaueko saioan, Durangoko Liburu eta Disko Azokarako kaleratu diren diskoen errepasoa eginen dugu, argitaratu berri diren ekoizpenak ezagutuz. Guztira 25 disko inguru entzuteko parada izango dugu, autoekoizpenak eta diskoetxeen argitaralpenak tarteko.Musika krisian omen dagoen garai nahasi hauetan, inoiz baino disko gehiago kaleratzen direlako…Musika sorkuntza krisian ez dagoelako. Gaueko 21:00etatik aurrera, FM-aren uhinetan eta internet sarean barna.

ENTZUN SAIOA ZUZENEAN:
ASTEAZKENERO: Gaueko 21:00 – 23:00

FM BIDEZ: Tolosaldean 107,5 eta 102,10
INTERNET BIDEZ: http://www.txolarre.org/

U.K. BILL.... Ukabilaren kolpekada

2009-11-17T19:33:00.000-08:00

Aste honetako zuzeneko elkarrizketan, U.K. Bill taldearen disko berria ezagutzeko aukera izanen dugu. Añorgako taldeak “Paradisu Sekretua” izeneko diskoa ekarriko du besapean, Añorghetto zigilu autoekoiztuan argitaratua. Irratsaioaren lehen zatian, azken asteetan kaleratu diren zenbait disko eta maketa entzuteko parada izango dugu, eta saioaren bigarren zatian ekingo diogu elkarrizketari. Saioaren azken txanpan berriz, asteburuan izango diren zenbait emanaldi aipatuko ditugu agenda txokoan.

MORE INFO:

http://www.ukbill.net/

http://www.myspace.com/ukabill

http://promomusika.com/albisteak/?b=1

ENTZUN SAIOA:

Descargar mp3

LOS STUPEFACTOS... Olatuak eta surfa!

2009-11-09T15:25:00.000-08:00

Asteazken honetan Hondarribiko LOS STUPEFACTOS taldea izanen dugu Txolarre irratiko estudioetan disko berria aurkezten zuzeneko. Psilocybina Records diskoetxeak kaleraturiko “Psilocybenean” diskoa ezagutuko dugu taldekideen laguntzaz ordubete inguru iraungo duen elkarrizketa mamitsuan. Surf-rock musika eta loredun alkandoren itsaso zabalean murgilduko gara doinu instrumentalak nagusituko diren gauean.

MORE INFO:

http://www.myspace.com/losstupefactos

http://www.psilocybenea.com

Adi Belarriak... BERTSIO GAUA II

2009-11-03T16:41:00.000-08:00

Kasu. Adi belarriak!!!!
Euskal musikagintzaren bidezidorretatik barna Bide Okerra aurrera darrai etengabean. Zuzeneko elkarrizketak alde batera utzi eta BERTSIO GAUAri ekingo diogu saio berri bat burutuz. Pasaden Bertsio Gauean (http://bideokerretikzuzen.blogspot.com/2009/10/bertsio-gaua.html) 60, 70, eta 80 bakarlari eta goizkantariak rock eremuetara ekarri genituen, kantu batek izan ditzakeen moldaketak eta aldaerak azaleratuz. Gaur gauean berriz Euskal Rock musika taldeak, Euskal Rock musika taldeei eginiko bertsio eta moldaketak izanen dira protagonista bakarrak. Kantu zerrenda itzela osatu dugu, eta segur aski, beste saio bat egiteko materiala izango dugu datozen hilabeteetan.
Honatx entzungo denaren izebergaren punta….
Erruduna (Ruper Ordorika – Danba)
Oker Nago (Kortatu – The Solanos)
Marea Gora (Itoiz – Koma)
Homo Homini Lupus (Beti Mugan – Sagarroi)
Neu Onena (Jotakie - Captain Nemo)
Ehun Ginen (M-Ak – Kortatu)
Hilzori II (Itoiz – Zea Mays)
Armiarma Sarea (Bap – Nuuk At)
Demokrazia (Eskoria-tza – Soziedad Alkoholika)
Dena Ongi Dabil (Zarama – Potemkin)
Ikusi (Delirium Tremens – Eraso)
Egunsentian (Kuraia – The Sparteens)
Itxoiten (Negu Gorriak – Desoreka)
Aitarik Ez Dut (Errobi – Negu Gorriak)
Rock&Rolla Batzokian (Herzainak – Platero Y Tu)
….
ENTZUN SAIOA edo DESKARGATU
Descargar mp3

R taldea elkarrizketatuko dugu!

2009-10-26T18:09:00.000-07:00

Aste honetako irratsaioan Andoaingo R taldea izanen dugu studioan gonbidatu bezala. “Uneak” (Bonberenea Ekintzak 09) diskoa argitaratu berri dela eta, zuzeneko elkarrizketa egingo dugu gaueko 21:00 aurrera. Saioaren lehen zatian, maketak eta disko berriak jarriko ditugu, eta bigarren zatian berriz, R taldeko kideekin batera ezagutuko dugu disko berria.

R TALDEARI BURUZKO INFO ZABALAGOA:

http://r-taldea.blogspot.com/

http://bonberenea.com/R-uneak.html

ENTZUN SAIOA:
Descargar mp3

METRALLETA eta DISKOIRAA. Split EPa aurkezten

2009-10-20T09:21:00.000-07:00

EGURRA!!!
Abiadura, ostia txarra eta zapatilla aste honetako irratsaioaren osagarri nagusiak izanen dira. Zaratazarautz kolektiboko bi musika talde gonbidatu ditugu estudiora argitaratu berri duten Split EPa aurkeztera. Alde batetik METRALLETA taldea. Biniloaren beste aldean berriz, DISKOIRÄÄ banda. Power biolentzia, Hardcore azkar eta Punk zikinaren zaletuentzako ezinbesteko hitzordua!!!! Entzumen sentibera, ahul, makal, pattal, mengel, erkin, edota eskasentzako gomendagarria ez den saioa!
http://www.mundurat.net/diskoiraa/
http://www.mundurat.net/zaratazarautz/6/
http://www.mundurat.net/zaratazarautz/

BIOK taldeari elkerrizketa "Gaur ez da dena grisa" diskoaren aurkezpena

2009-10-13T15:50:00.000-07:00

Asteazkenero lez, Bide Okerra hartuko dugu beste gau batez Euskal Herriko rock musikaren errepidean pneumatikoak erretzeko. Gaurkoan, asteburuko agendari so eginen diogu lehen orduan, bigarren zatirako aurrez grabaturiko elkarrizketa bat jarriko dugularik. BIOK taldearen “Gaur ez da dena grisa” (Baga-Biga musika ideiak) diskoa aurkeztuko dugu telefono bidez buruturiko elkarrizketa mamitsuan.

* Zure taldearen musika gure irratsaioan jartzea nahi baduzu, igorri zure maketa edo
diskoa helbide honetara: (Hasi zaizkigu diskoak iristen, laster jarriko ditu saioan, mila esker zinez)

ENTZUN SAIOA ZUZENEAN:
ASTEAZKENERO: Gaueko 21:00 – 23:00

FM BIDEZ: Tolosaldean 107,5 eta 102,10
INTERNET BIDEZ: http://txolarre.org/

BIDE OKERRETIK…ZUZEN! "Fosbury" Jauzia egiteko prest!

2009-10-06T09:05:00.000-07:00

Pasaden asteko denboraldiko lehen saioa burutu eta gero, honakoan, INORENERONI taldearen estudioko azken diskoa ezagutuko dugu gaueko 21:00etatik aurrera. Okene Abrego taldeko abeslariak “Fosbury” diskoaren ingurukoak kontatuko dizkigu Txolarre Irratiko estudioetatik zuzeneko elkarrizketan. Hortaz aparte, disko berriak, albisteak, eta asteburuko agenda izango dugu saioaren azken zatian.

* Zure taldearen musika gure irratsaioan jartzea nahi baduzu, igorri zure maketa edo diskoa helbide honetara:
TXOLARRE IRRATIA (BIDE OKERRETIK ZUZEN saioa)
Sakabanatua 5

20270 Anoeta (Gipuzkoa)

ENTZUN SAIOA ZUZENEAN:
ASTEAZKENERO: Gaueko 21:00 – 23:00
FM BIDEZ: Tolosaldean 107,5 eta 102,10
INTERNET BIDEZ: http://www.txolarre.org

IRRATSAIO ZAHARRAK ENTZUTEKO:
http://bideokerretikzuzen.blogspot.com/

Bueltan gara......

2009-09-27T17:59:00.001-07:00

Bueltan gara!!!
Beste denboraldi batez, Euskal Herrian egiten den rock musikaren erakuslehio izateko asmoz sortu zen irratsaioa abian jartzen da! Motorra bero dago eta depositoa gasolinaz lepo...
Lehen saioan, udaran argitaratu diren diskoei errepaso emango diogu, bai eta, Durangoko Euskal Liburu eta Disko Azokara begira argitaratu diren azken ekoizpenak ezagutuko ditugu.

*Gune berria jartzen dugu abian, gure betiko orria Blogger-eko adixkideek blokeatu baitigute. Apurka-apurka igoko ditugu irratsaio zaharrak. Bitartean, izan untsa!

EUSKAL HERRIA ZUZENEAN......

2009-07-02T12:39:00.000-07:00

Gaur gauean EUSKAL HERRIA ZUZENEAN jaialdiari buruzko saio monografikoa burutuko dugu gaueko 21:00etatik aurrera. Uztailaren, 3, 4 eta 5an ospatuko den jaialdiaren berri osatua izango dugu bi ordu iraungo dituen saio monografikoan.

EUSKAL HERRIA ZUZENEAN ekimeneko antolatzaile batekin egin dugu hitzordua saioaren lehen zatirako. Eneritz Zabaleta izango dugu gurean jaialdiaren inguruko datu eta albisteekin. Berarekin batera ezagutuko ditugu, aurtengoan Heletan ospatuko den EHZ jaialdiaren 14. edizioko datu guztiak. Egitaraua egunez egun, parte hartuko duten musika taldeak, ordutegiak, guen ezberdinak bitxikeriak….

Bigarren zatian gainera, zuzeneko koneksioak egingo ditugu pate hartuko duten zenbait musikari lagunekin….Besteak beste, telefono bidez sartuko dira CHE SUDAKA taldeko kideak, WILLIS DRUMMOND, ZURA, FIACHRAS….

2009-06-23T12:42:00.000-07:00

Gaur gauean HATORTXU ROCK elkartasun jaialdiari buruzko saio monografikoa burutuko dugu gaueko 21:00etatik aurrera. Ekainaren 19, 20 eta 21an ospatuko den jaialdiaren berri osatua izango dugu bi ordu iraungo dituen saio monografikoan.

HATORTXU ROCK ekimeneko antolatzaile batekin egin dugu hitzordua saioaren lehen zatirako. Endika Alonso izango dugu gurean jaialdiaren inguruko datu eta albisteekin. Berarekin batera ezagutuko ditugu, Euskal Herrian inoiz burutu den musika ekimen handiena izango den jaialdiaren barneko tripak. Egitaraua egunez egun, parte hartuko duten musika taldeak, ordutegiak, guen ezberdinak bitxikeriak….

Bigarren zatian gainera, zuzeneko koneksioak egingo ditugu pate hartuko duten zenbait musikari lagunekin….Besteak beste, telefono bidez sartuko dira Doctor Deseo taldeko Francis, Juan Sangre Ekon-Governors, Jon Akatu, FernandoReincidentes, Kerobiako Xabier, Aiora Zea Mays, Fran Hesian, Auo Etsaiak, XabiKaotiko, Lander LOR, RIP taldeko Txerra…

…Entzun ala hil!

MORE INFO:
http://www.hatortxurock.com

2009-05-27T12:45:00.000-07:00

Gaur gaueko irratsaioan kaxoian gorderik izan ditugun diskoei hautsa kenduko diegu eta nobedade eta disko berriei eginen diegu leku gaueko 9etatik aurrera. Berriki argitaratu diren diskoak izanen dira gaurko protagonistak, bai eta Durangoko azokak utzi zizkigun dozenaka erreferentzi ere.. euskal musikaren errepidean beti ere, eszena lokalaren alde. Igo bolumenaren botoia zeruraino, eta gozatu bertako musikaz.
Pasaden astean egin genuen gure lehen bertsio gaua... Izanen dira bertsio gau gehiago: Aurrera begira Euskal Herriko Rock taldeak Euskal Herriko rock taldeei eginiko bertsioak eta Euskal Herriko musika taldeek atzerriko taldeetatik hartu dituzten kantuak bilatzen eta prestatzen ari gara. Norbaitek proposamenik badu: bideokerretik@gmail.com helbidean gustura hartuko ditugu bertsioen zerrendak.

BERTSIO GAUA....

2009-05-18T12:48:00.000-07:00

Gaur gauean, bertsio gaua izanen dugu BIDE OKERRETIK…ZUZEN! Irratsaioan. Gaueko 21,00etatik aurrera Euskal Herriko musika talde eta bakarlariak izanen ditugu protagonista bi ordu iraungo dituen saio monografikoan. Gurean, Euskal Herriko musika eszenan, ohikoak dira kantuen moldaketak, askotan, benatako jatorria ere ahantzi egiten dugularik. Gaurko saioan 70. Hamarkadaren inguruan sorturiko kantuak izanen dira protagonista nagusi, baino batez ere, kantu horien gainean rock musika ardatz hartuta egindako bertsioak entzunen ditugu. Kantu originalak eta bertsioak tartekatuko ditugu, kantu bakoitzaren jatorria azalduz eta bakoitzari berea emanez.

Horrela bada, Gontzal Mendibil, Antton Valverde, Imanol, Mikel Laboa, Oskorri, Urko, Pantxoa & Peio (edo Peio&Pantxoa), Xabier Lete, Irune&Andoni Argoitia, Bendito Lertxundi, Egan… bezalakoan kantu originalak entzungo ditugu.

Zentzu horretan, Ken Zazpi, Kloratita, Etsaiak, Morau, Banda Batxoki, Doctor Deseo, Leihotikan, Exkixu, Oliba Gorriak, Soziedad Alkoholika, Petti, RIP, Eñaut Elorrieta, Kanka, Lin Ton Taun, Sarkor…

Izanen dira bertsio gau gehiago: Aurrera begira Euskal Herriko Rock taldeak Euskal Herriko rock taldeei eginiko bertsioak eta Euskal Herriko musika taldeek atzerriko taldeetatik hartu dituzten kantuak bilatzen eta prestatzen ari gara. Norbaitek proposamenik badu: bideokerretik@gmail.com helbidean gustura hartuko ditugu bertsioen zerrendak.

ENTZUN SAIOA:

Descargar mp3